Tottenham - Arsenal (CC)

Jæja þá er ljóst að við eigum leik gegn Arsenal í Carling bikarnum. Arsenal unnu Liverpool 3-6 í kvöld. Ég horfði á seinni hálfleikinn og ég verð að segja að ég er ekki að farast úr bjartsýni. Þó svo að ég sé ekkert fyrir það að rakka niður lið, þá hef ég held ég aldrei dásamað Arsenal. En ég tek svo sannarlega ofan fyrir þeim fyrir framistöðuna í kvöld. Það lið sem getur mætt á Anfield með unglingaliðið (nb. Það voru 7 leikmenn 19 ára og yngri sem komu við sögu í liði Arsenal) og ekki bara unnið heldur skorað 6 mörk á móti liði sem fær örsjaldan á sig mark á heimavelli, fær mína virðingu. Það er nokkuð ljóst á þessum tveimur leikjum sem ég hef séð þá spila á móti Liverpool að þeir eru sjóðandi heitir. Ég hélt að það myndi vinna með okkur að leikjaálagið á Arsenal myndi verða til þess að Wenger myndi mæta með unga og óreynda leikmenn í leikina. Núna hinsvegar sér maður að það skiptir engu máli.

Ég er þó langt því frá búinn að afskrifa okkur. Það eru nokkrir hlutir sem munu vinna með okkur í þessum leikjum og ég hef enn fulla trú á að okkur takist að vinna þessa keppni. En nóg um það að sinni ég fer betur í þessa leiki þegar nær dregur.

Cardiff 0 - Spurs 0 (FA)

Ekki tókst okkur að komast upp úr þriðju umferðinni í dag. Þetta var slakur leikur af okkar hálfu og vorum við stálheppnir að fara með stöðuna 0-0 inn í hálfleik. Síðari hálfleikur var aðeins skárri þó leikmenn hafi verið langt frá sínu besta. Það var reyndar mikil meiðsli í leikmannahóp okkar. Ghaly,Mido,King og Jenas stóðust ekki læknisskoðun og Lennon og Keane voru ekki búnir að ná sér af fullu þó þeir hafi komist á bekkinn. Það kannski afsakar ekki slæma spilamennsku okkar leikmanna en kannski skýrir hana af hluta til. Varnarlínan var óhemju ótraust og var eins og gatasigti. Lee var að mínu mati að spila ömurlega í þessum leik. Hann má teljast stálheppinn að hafa ekki átt stoðsendingu á leikmann Cardiff á 15 mín. Ég græt þá ákvörðun Jol mikið að treysta ekki Ekotto í þessa stöðu.

Tainio var heldur ekki að gera góða hluti þannig séð. Hann fær 10 fyrir að reyna en einhvernveginn var lokasnertingin ekki heppnast hjá honum. Murphy stóð heldur ekki undir væntingum í þessum leik. Defoe kom greinilega mjög illa upplagður í leikinn því frá fyrstu mínútu var hann að pirrast og skammast. Í rauninni er eiginlega bara skemmst frá því að segja að enginn leikmaður var að spila á pari við getu, jah nema kannski Davenport. Það kann að skýrast af tvennu. Aðstæður á vellinum voru mjög slæmar þar sem helliringdi látlaust út allann leikinn. Það kann líka að skýrast af því að Cardiff voru að spila frábærlega. Allir leikmenn liðsins voru staðráðnir í því að láta úrvalsdeildarliðið hafa fyrir hlutunum. Baráttan var til algjörrar fyrimyndar. Cardiff á skilið klapp á bakið fyrir leikinn.

En við tökum þá í bakaríið þegar næsti leikur verður spilaður þann 16 jan minnir mig.

Cardiff - Spurs (FA)

Jæja nú er komið að fyrsta leik okkar í FA bikarkeppninni. Við komum sem fyrr inn í bikarkeppnina í þriðju umferð. Andstæðingar okkar eru Cardiff frá Veils (Welsh). Já FA bikarkeppnin samanstendur af liðum frá Englandi og Veils. Við munum spila þennann leik s.s á Ninjan Park heimavelli Cardiff. Cardiff er eina liðið utan Englands sem hefur unnið þessa keppni. Áhangendur þeirra eru einhverjir þeir ófriðasömustu sem finnast á Bretlandseyjum og er ávallt mikil löggæsla í kringum bikarleikina þeirra. Fyrir sléttu ári spiluðum við í sömu keppni á móti Leichester. Eftir að hafa náð 2-0 forustu náðum við að klúðra málunum og þegar leikurinn var flautaður af höfðu Leichester náð að skora 3 mörk. Lokatölur 3-2 fyrir Leichester og þar með var ljóst að liðið hafði sett félagsmet. Aldrei fyrr höfðum við átt jafn slæmt bikarár og í fyrra. Það má eiginlega segja að þessi leikur hafi verið ákveðinn verndipunktur á síðasta ári. Næstu tveir mánuðirnir skiluðu aðeins einum sigri í hús.

Nú virðist öldin vera önnur. Við höfum nú unnið alla okkar leiki utan PL, engin jafntefli heldur bara sigrar!!! Það er algjört grundvallarmál í mínum huga að vinna þennann leik. Það bara verður að gerast. Ef við náum að vinna þennann leik skiptir framhaldið ekki jafn miklu máli í mínum huga. Aðalmálið er að ná að gera betur í þessari keppni en í fyrra. Ég veit það líka að ef leikmenn ætla sér að vinna þennan leik þá munu þeir bara gera það, jafnvel þó við séum á útivelli. Það held ég að sé borðleggjandi að leikmenn ætla sér að gera betur en í fyrra. Þess vegna er sigur eina útkoman sem ég sé að geti komið úr þessum leik.

Liðið


-----------------Robbo------------------
Stalteri----Daws-----Davenport-----Ekotto
Ghaly------Zokora---Tainio--------Steed
------------Defoe----Berbatov-----------

Ég er svona að gera ráð fyrir að Jol vilji leyfa þeim sem spiluðu hvað mest í jólatörninni að hvílast aðeins lengur. Hann hefur þá samt örugglega á bekknum ef við skyldum lenda í vanda. Ég ætla að skjóta á að Jol hafi ekki verið að refsa Zokora í Pompey leiknum fyrir framistöðuna á móti Liverpool heldur hafi hann verið að hvíla hann. Þessvegna spái ég að THUDD fái smá hvíld. Annars er þetta bara skot í myrkri. Við stöndum á tímamótum nú í meiðslamálum þar sem flestir eru að ná sér af meiðslum. Lennon, Keane, Mido, King og Jenas eru allir annaðhvort byrjaðir að æfa eða við það að byrja að æfa. Það er því spurning hvort einhverjir af þeim fái ekki smá tíma inná vellinum gegn Cardiff.

Ég spái þessu 1-3 fyrir Spurs
COYS!

Liðið (Vinstri Bakvörður)

Vinstri bakvarðastaðan hefur oft verið vandamálastaða hjá okkur. Sú hugmyndafræði sem ég hef um bakvarðastöðuna er sú að bakverðirnir báðum megin verði að vera mjög álíkir. Það sem ég á við með þessu er að bakvörðurinn hægrameginn má ekki vera til baka þegar bakvörðurinn vinstrameginn er sókndjarfur. Þetta þótti mér vanta á síðasta tímabili. Lee og Stalteri voru alltof ólíkir. Lee var jafnvel sókndjarfari en flestir miðjumenn okkar á meðan Stalteri var mun ragari við að hætta sér fram. Færslan á liðinu var því í mjög ójöfn. Ég veit ekki hvort ég er að fara með hlutina of langt og þú sem lest hugsar "rólegur, þetta er bara fótbolti".
Í þessum skrifum nota ég skammstafanir úr ensku, sem margir þekkja úr CM leikjunum. (dc) þýðir þá "defence - Center" (lb) Þýðir þá "left back" eða vinstri bakvörður o.s.frv.
Eins og ég kom inná var Lee að sinna v-bakverðinum í fyrra. Nú virðist hann ekki eiga jafn öruggt sæti með komu Ekotto. Við skulum nú fara yfir leikmennina sem sinna þessari stöðu og taka það svo saman hvort staðan sé sterkari nú en í fyrra.

Benoit Assou-Ekotto (32)
Ekotto er 22 ára gamall Frakki/Kamerúni. Hann er fæddur 24 mars árið 1984 í Arras í Frakklandi. Foreldrar hans eru frá Kamerún og hefur því Ekotto tvöfalt ríkisfang. Ekotto fékk kall frá liðið Kamerún í Afríkukeppnina fyrr á þessu ári en hafnaði tilboðinu af persónulegum ástæðum. Margir vilja meina að hann hafi hafnað tilboðinu af þeirri ástæðu að hann setji markið á franska landsliðið.

Ekotto hóf atvinnumannaferilinn af alvöru 20 ára gamall þegar hann spilaði sinn fyrsta leik með Lens í Frakklandi gegn PSG. Ekotto kom upp í gegnum unglingastarf Lens. Hann spilaði 66 leiki með Lens og var á síðasta tímabili einn besti vinstri-bakvörðurinn í frönsku deildinni. Hann átti fast sæti í liði Lens á síðasta tímabili sem endaði í 4. sæti í deildinni. Eftir tímabilið voru mörg stór lið á eftir kappanum. Hann var talinn eitt mesta efnið í Frakklandi. Það var þó draumur hans um að spila á Englandi sem varð til þess að aldrei var spurning í hans huga á hvaða blað hann ætti að skrifa nafn sitt. Í júní skrifaði hann svo undir samning við okkur og var kaupverðið um 3,5 millj punda. Ekotto þykir fjölhæfur leikmaður og spilaði þar til fyrir 2 árum alltaf stöðu miðjumanns (mc) hann var svo fenginn eitt sinn til að leysa stöðu v-bakvarðar og vakti mikla athygli með framistöðu sinni. Hann þykir einnig liðtækur sem vinstri vængmaður.

Ekotto hefur að mínu viti tekið svolítið við hlutskipti Stalteri í fyrra (fyrrihluta tímabils). Hann er mjög yfirvegaður og er ekki mest áberandi maðurinn á vellinum. Það kann að skýra það að hann hefur ekki fengið það hrós sem hann á skilið. Hann hefur skilað varnarvinnunni mjög vel það sem af er tímabili. Þessi gagnrýni kann líka reyndar að skýrast af hluta til af því að hann er að spila í skugganum af besta hægri-bakverði í deildinni Chimbonda. Við skulum ekki gleyma því að þetta er leikmaður sem er 22 ára gamall og spilaði sinn fyrsta "top flight" (kann einhver íslenskt orð yfir þetta?) fótbolta fyrir tveimur árum. Hann kemur frá Frakklandi þar sem fótboltinn er gjörólíkur enskum fótbolta. Það er því undravert miðað við þetta hversu fljótur hann er að aðlagast liðinu. Ég tel mig sjá það í leik hans að hann gæti myndað mjög gott mótvægi við Chimbonda. Mér finnst ég sjá það á leik hans að hann er mjög góður framávið þó hann hafi ekki enn fullt sjálfstraust til að beyta sér mikið framávið. Það er í raun sorglegt að umræðan var nánast engin fram að Arsenalleiknum en eftir hann hefur hann mátt sæta mjög harðri gagnrýni.

Samantekt
Að mínu viti hefur Ekotto spilað með miklum ágætum það sem af er tímabili. Ef við tökum það með í dæmið að þetta er leikmaður sem hóf að spila alvöru fótbolta fyrir tveimur árum við gjörólíkar aðstæður er hann búinn að spila frábærlega. Við skulum ekki gleyma því að þessi leikmaður er ekki á hátindinum. Hann er enn bara ungur og efnilegur. Hann á bara eftir að verða betri. Hann er að mínu viti okkar besti kostur í vinstri-bakvörðinn. Ef hann og Chimbonda eiga eftir að ílengjast hjá liðinu eiga þeir eftir að verða okkur ómetanlegir. Ég hvet alla sem efast um leikmanninn að veita honum meiri athygli í leikjunum og horfa á hann án allra fordóma.

Young Pyo-Lee (3)
Lee er suður-kóreskur landsliðsmaður. Hann er fæddur 23 apríl 1977 og er því 29 ára gamall. Hann er 178 cm á hæð og um 70kg. Lee var keyptur frá Psv Eindhoven í ágúst árið 2005 á tæpar 1,4 millj punda. Hann er líkt og Ekotto mjög fjölhæfur leikmaður sem getur spilað hægra og vinstramegin á vellinum. Áður en hann kom til Psv spilaði hann mikið sem miðjumaður (mc). Lee býr yfir miklum hraða og ég held að hann búi einnig yfir mikilli knatttækni. Mér þykir Lee ekki enn hafa sýnt sitt besta með Spurs. Hann má eiga það að hann er ekki latur og var svolítið ranglega gagnrýndur á síðasta tímabili. Það var kannski til of mikils ætlast af honum í fyrra. Hann nánast bar upp sóknarleik liðsins. Þetta var til þess að hann fór mikið úr stöðu sinni og Davids sem var oft á vinstri kanntinum átti að taka stöðu hans í bakverðinum. Davids var sjaldnast að sjá um þá hlið mála og var því Lee oft kennt um að vinstri vængurinn væri of opinn. Hann hefur hinsvegar sýnt það að hann er prýðis varnarmaður og ágætis sóknarmaður. Hann er mjög mikilvægur fyrir liðið þar sem hann getur leyst báðar bakvarðastöðurnar með sóma. Ég skal viðurkenna að Lee fær sjaldnast sanngjarna gagnrýni hjá mér. Það er eitthvað í leik hans sem mér finnst gefa það til kynna að hann sé að halda aftur af sér. Það vantar eitthvað sjálfstraust. Oft þegar hann geystis upp völlinn finnst mér eins og hann geti gert lítið úr varnarmanninum ef honum sýnist, en svo kemur sendingin til baka. Það má því segja að hann fái ekki sanngjarna gagnrýni frá mér því ég hef meiri trú á honum en hann sjálfur. Ég gleymi því ekki í fyrra þegar hann ákvað að sóla Steve Finnan upp úr skónum gegn Liverpool. Ég man svo einusinni eftir að hann hafi gert þetta á þessari leiktíð. Málið er bara að hann reynir helst ekki þessar gabbhreyfingar. Það er svo mikið vopn í höndum leikmanna sem hafa þennan hraða sem Lee hefur, að geta sett varnarmanninn út af laginu með einni eða fleirri gabbhreyfingu, þá er hann sloppinn innfyrir.

Samantekt
Lee er eins og ég kom inná ómetanlegur liðsstyrkur. Hann gefur Chimbonda og Ekotto lítið eftir og ef annar þeirra meiðist veikist liðið ekki mikið. En Lee er ekkert unglamb lengur. Mér finnst mikilvægara að Ekotto fái að dafna í vinstri bakverðinum. Ég myndi alls ekki vilja missa Lee frá okkur.

Dorian Dervite (35)
Dervite er franskur unglingalandsliðsmaður. Hann er aðeins 18 ára gamall. Það fer kannski að missa marks ef ég minnist á að þessi leikmaður sé líka fjölhæfur, en hann er það nú samt. Þetta er einn af stærri mönnum Spurs. Hann er 193cm á hæð. Hann spilar jafnt í vinstri- bakverðinum sem og í miðri vörninni. Hann er mjög líkamlega sterkur og ákveðinn. Hann þykir einnig hafa furðugott vald á boltanum miðað við líkamsburði. Dervite Kom frá Lille í sumar þar sem miklar vonir voru bundnar við hann. Hann þykir geysilega efnilegur og hefur verið fyriliði u- 18 liðs Frakka. Dervite hefur spilað einn leik með aðaliði Spurs þegar hann spilaði bikarleikinn gegn Port Vale. Hann spilaði þá stöðu varnarmanns (dc).

Samantekt
Það sem ég veit um manninn er bara það sem ég hef lesið. Ég á enn eftir að sjá hann spila. Af því sem ég hef lesið virðist þetta vera þrælefnilegur leikmaður. Það kæmi mér ekki á óvart þó hann færi að banka hressilega á dyrnar eftir c.a 2 ár. En líklega sjáum við lítið af honum þetta tímabilið, enda aðeins 18 ára.

Reto Ziegler
Reto er skv. heimasíðu Spurs skrifaður sem vinstri bakvörður. Ég get ekki séð að hann sé góður í þeirri stöðu. Ég held að vinstri vængurinn sé miklu frekar hans staða. Allavega mun ég taka hann fyrir þegar ég fjalla um vinstri vænginn.


Heildarniðurstaða
Ég tel þessa stöðu standa mun sterkara núna heldur en í fyrra. Það er ekki aðeins vegna komu Ekotto, heldur líka komu Steed Malbranque. Nú getur vinstri bakvörðurinn spilað sem slíkur. Ég tel það ekki vera góða taktík að láta alltaf bakvörðinn geysast fram og að vængmaðurinn dekki hans stöðu á meðan. Að sjálfsögðu er gott þegar bakvörðurinn hjálpar til á vængnum með því að koma í yfirhlaup eða annað slíkt. En mér finnst það ekki ganga að í hvert sinn sem liðið sæki eigi vængmaðurinn að detta til baka og bakvörðurinn tekur stöðu hans. Koma Ekotto og Dervite hefur að sjálfsögðu mikið að segja. Þannig að við stöndum betur nú en í fyrra hvað Vinstri bakvörðinn varðar.

Næst mun ég taka fyrir stöðu Miðvarðar (dc)

Portsmouth 1 - Spurs 1

Jafntefli á móti Portsmouth hefðu talist slæm úrslit fyrir þetta tímabil. En eins og þeir hafa verið að spila það sem af er tímabili er maður bara nokkuð sáttur við úrslitin. Leikurinn byrjaði ekki vel fyrir okkar menn. Hossam Ghaly missti 4 tennur og hlaut skurði á andliti þegar fyrrum leikmaður Spurs Noe Pamarot sparkaði í andlit Ghaly. Þulirnir sögðu að þetta ætti að vera gult spjald en ég veit ekki? Ghaly beygði sig ansi langt niður eftir boltanum og ég efast um að Pamarot hafi séð Ghaly. Allavega vill ég ekki saka hann um að hafa gert neitt viljandi. Það má vel vera að Pamarot hafi kannski lyft fætinum of hátt, það má vera að það réttlæti gult spjald en ég held að þetta hafi bara verið slys. Það var allavega mjög óhugnarlegt að sjá það í endursýningu þegar tennurnar spýttust úr munni Ghaly. Ghaly fær hinsvegar risastórann plús í kladdan hjá mér fyrir að spila allann fyrri hálfleikinn hálftenntur. Sem betur fer fundust allar 4 tennur Ghaly og þær sendar með honum í umslagi til tannsa í hálfleik.

Liðin voru mjög jöfn á vellinum og hvorugt liðið náði að yfirspila hitt. Portsmouth komst yfir í fyrrihálfleik. Það er ekki hægt að kenna neinum um markið. Skotið hrökk af Davenport og því náði Robbo ekki að koma í veg fyrir það. Murphy kom inná í hálfleik fyrir Ghlay og átti stoðsendinguna á Steed sem skallaði bolltann í netið. Ég hreinlega skil ekki af hverju Murphy er ekki að spila meira. Hann hefur að mínu mati verið mjög góður í þau fáu skipti sem hann fær að spila.

Það var svo mjög skemmtilegt atvik sem átti sér stað í seinni hálfleik þegar Sean Davis fyrrum leikmaður Spurs braut á Lee. Þetta var klárt brot og ekkert við það að athuga að manni fannst. Hinsvegar var Davis ekki á sama máli og til að útskýra það fyrir dómara leiksins hvað hafði gerst tók hann sig til og fleygði sér í jörðina, til að gefa það til kynna að Lee hafi nú fallið helst til of auðveldlega. Þetta var nú með því fyndnara sem ég hef séð á vellinum.

En eins og áður segir er ég nokkuð sáttur með úrslitin. Portsmouth hefur aðeins tapað einum heimaleik á tímabilinu og við aðeins unnið einn útileik. Portsmouth er líka búið að koma mikið á óvart þetta tímabilið og því var jafntefli sanngjarnt og ásættanlegt.

Besti maður Spurs var án nokkurs einasta vafa Dimitar Berbatov. Þessi leikmaður er að mínu viti einn af 5 bestu framherjum deildarinnar í dag.

Nú fá leikmenn nokkurra daga kærkomna hvíld. Ég held að Chimbonda, Defoe, Dawson og fleirri taki hvíldinni fagnandi.