Tottenham 2 - Portsmouth 1

Jæja nú er á mörgu að taka. Við náðum að vinna annann úrvalsdeildarleikinn í dag. Ég ætla að lýsa því yfir núna að lægðin sé yfirstaðin. Mér fannst algjör bragarmunur á liðinu frá því sem maður hefur séð hingað til í síðustu tveimur leikjum. Maður er samt ekkert of öruggur með sigur í næsta leik þar sem við erum að fara mæta heitasta liði deildarinnar. En að leiknum í dag. Ég tel það hafa verið hárrétta ákvörðun hjá Jol að hafa Mido á bekknum í þessum leik eftir ummæli hans.
Markið hans Murphy var algjör snilld!!! Það skrifast reyndar að hluta til á David James þar sem hann var of seinn að átta sig. En að skora mark eftir nokkra sekúndna leik er náttúrulega byrjun sem allir óska sér. Mér fannst enginn leikmaður í okkar liði eiga slakan dag í dag og mér fannst ég sjá glytta í gamla takta hjá Defoe. Lánleysi Jenas hélt áfram í dag en ágætis leikur samt. Dawson var algjörlega frábær. Ghaly sýndi að hann hefur hæfileikana til að spila í Spurstreyju þó hann þurfi aðeins að slípa leik sinn að ensku deildinni. Já liðið var bara fínt í dag. En ég er samt ekki sáttur. Ég er gjörsamlega brjálaður yfir hegðun Zokora í leiknum. Zokora henti sér í jörðina í vítateig Portsmouth og fiskaði þar með víti. Maður hefur hingað til flaggað því við stuðningsmenn annara liða að Spurs sé líklega eina liðið í deildinni sem er bara með fótboltaleikmenn en enga fótboltaleikara. Þetta tókst Zokora að eyðileggja fyrir stuðningsmönnum Spurs í dag. Munið þið eftir atviki í leik Slavia Praha og Spurs þegar R.Keane rann á sleipu grasinu og spratt á fætur og veifaði vísifingri í átt að dómaranum til að gefa það til kynna að það hafi ekki verið brotið á honum? Þetta er það sem ég er að tala um! Svona vill ég að mitt lið leiki. Það sást líka þegar Zokora fiskaði var enginn sem heimtaði vítaspyrnu (sýndist mér)nema Zokora. Það var ekki einn leikmaður sem kom og gaf Zokora klapp fyrir þessa tilburði. Í algjörri hreinskilni myndi ég heldur viljað hafa náð jafntefli úr leiknum frekar en að orðspor félagsins hafi verið svert með svona leikaraskap. Ef ég réði eitthverju í Spurs myndi ég sekta Zokora fyrir þetta.

Note to self: skrifa við tækifæri um markvörðslu Robbo á lokamínútunum.

Mido að sýna sitt rétta andlit?

Nú var ég að lesa frétt á NewsNow sem mér fannst mjög leiðinleg. Á síðasta tímabili tók ég ástfóstri við einum af leikmönnum okkar kannski umfram aðra. Ég er að tala um leikmanninn Mido. Ástæða þess að ég var svo hrifinn af honum var ekki bara að mér þótti hann góður leikmaður heldur líka hvað hann var góður teamplayer. Hann kom reglulega fram í fjölmiðlum til að dásama félagið og talaði alltaf vel um samherja sína og svona. Hann var svona nice guy. Hann er kannski betur þekktur sem bad boy en mér fannst eitthvað hafa breyst á síðasta tímabili. Nú ætla ég hinsvegar að lýsa yfir óánægju minni með Mido undanfarið. Mér finnst hann hafa verið hrokafullur og leiðinlegur það sem af er tímabili. Í fyrra klappaði hann alltaf lófunum ef hann fékk góða sendingu frá samherjum, svona til að gefa sendingamanninum kredid fyrir góða sendingu. Þetta finnst mér alltaf góðs viti, svona smá pepp og sýnir góða liðsheild. Þetta hefur alveg hætt eftir endurkomu hans. Ég sá Mido einnig oft hughreysta samherja þegar þeir klúðruðu færi eða gerðu önnur mistök. Þetta hef ég heldur ekki séð eftir endurkomu hans. Svo les ég það í þessari grein að hann sé að segja að Sol Cambell sé lélegasti varnarmaður sem hann hefur mætt. Nú ætla ég ekkert að fara verja Sol eða neitt þannig, en hvernig dettur Mido í hug að segja þetta? Þvílíkur hroki. Ég geri mér alveg grein fyrir því að þetta gæti hafa verið grín. En þá því miður hefur hann bara ekki efni á því að gera grín á kostnað annara. Mido er búinn að vera í lægð núna í 8 mánuði. Þetta finnst mér alveg óhemju hrokafullt í því ljósi.
Ég er mjög ósáttur við þessi ummæli Mido en ef hann lætur ekki Sol Cambell líta mjög illa út á sunnudaginn mun Mido verða fyrir gríðarlegum álitshnekkjum. Það er eins gott að hann standi undir þessu. Ég mun því hafa auga með því hvernig Mido gengur á móti Sol á sunnudaginn.

Sigur!

Ef að Tottenham menn geta ekki tekið gleði sína á ný núna þá er eitthvað meira að. Við sigruðum nokkuð sannfærandi í kvöld. Enn vantar þó sjálfstraust í leikmenn nema Jenas virðist vera. Við áttum leikinn þrátt fyrir nokkrar góðar tilraunir hjá Slavia mönnum. Robbie Keane náði loks að skora eftir 5 mánaða markaþurrð. Þrátt fyrir að 1-0 sigur sé ekki stórsigur þá skulum við ekki gleyma því að við vorum með 5 stórjaxla meidda og því er það frábær árangur að vinna leikinn. Nú erum við komnir í riðlakeppnina í Uefa cup.

Tottenham                      Slavia Praha

Fimmtudaginn 28 sept. Kl: 19:00 á White Hart Lane

Slavia Praha
Gælunafn: Seweds
Stofnað: 1892
Stjóri: Karel Jarolím
Leikvangur: Stadion Evžena Rošického (19.032)
Grannar: Sparta Praha

Þó svo að Slavia geti varla talist sem eitt af stórveldum evrópu er þetta þó um margt merkilegt lið. Þetta er eitt af elstu knattspyrnufélögum á meginlandi evrópu. Þetta lið eru nú heimsmethafar fyrir það að vera það lið með elstu búningana. Frá árinu 1896 hafa Slvaia Praha aldrei skipt um liti eða eða þema á heimavallarbúningum liðsins. Heimavöllurinn er nú ekki mjög stór miðað við það sem gengur og gerist í Englandi. Hinsvegar hefur Slavia annann völl til að spila á ef um STÓRLEIKI er að ræða. Í aðeins göngufæri frá heimavelli Slvaia er stærsti íþróttaleikvangur heims til húsa (tekur 250.000 áhorfendur í sæti). Í augnarblikinu spilar Sparta Praha heimaleikina sína á einum af þeim 8 knattspyrnuvöllum sem eru til staðar í þessari byggingu.
         Sem stendur er Slavia Praha í fjárhagsvandræðum og hefur því ekki getað haldið í sína stærstu stjörnur. Flestir leikmenn liðsins eru ungir og efnilegir leikmenn. Þeir eiga nú 3 leikmenn sem spila í U-21 með landsliðum sínum. Slavia hefur undanfarin 15 ár alið af sér nokkra leikmenn á heimsmælikvarða eins og Patrik Berger, Vladimír Šmicer, Karel Poborský og Pavel Kuka.
         Glory tímabil Slavia var á tímum seinni heimstyrjaldarinnar. Á þeim tíma voru Slvaia með einn besta leikmann heims. Leikmaðurinn hét Josef "Pepi" Bican. Pepi þessi vann 5 sinnum gullskóinn í evrópu (flest mörk skoruð með félagsliði í evrópu). Hann náði auk þess þeim árangri að vera markahæsti leikmaður í deildarkeppni 12 sinnum á ferlinum. Eitt sinn var reynt að hafa uppá hvað Pepe hafi skorað mörg mörk á ferlinum og fengu menn þá út að hann hafi skorað um 5.000 mörk (Pele skoraði um 1.000). Þessi tala hefur aldrei fengist staðfest og því er það ekki heimsmet.
         Á þessum tíma voru Slavia Praha eitt af bestu liðum evrópu og náði langt í evrópukeppnum. Á síðustu árum hafa Slavia dregist nokkuð aftur. Fyrir 10 árum náðu þeir þó að vinna tékknesku deildina og komast í undanúrslit í Uefa Cup. S.P hafa ekki náð að standa undir væntingum það sem af er þessu tímabili líkt Spurs. Þeir hafa tapað 3 leikjum af 7 í deildinni og eru sem stendur um miðja deild.

Eignarhald

Nú var ég ekki á landinu né í netsambandi þegar fyrri leikurinn fór fram og veit því ekki hvort það hafi verið mikið í umræðunni að það séu sömu aðilar sem eiga ráðandi hlut í Slavia Praha og Tottenham. ENIC Sports Ltd á um 97% hlut í Slavia Praha sem er auðvitað ráðandi hlutur. Þetta sama fjárfestingafyrirtæki á 29,8% hlut í Tottenham Hotspur sem er ráðandi hlutur. Svona fyrst ég er á þeim nótum er í lagi að það komi fram að næst stærsti hluthafi Spurs (13%) er Alan Sugar fyrverandi stjórnarformaður Spurs. Eins og allir vita er það Daniel Levi sem er stjórnarformaður Spurs fyrir hönd ENIC Sports Ltd. ENIC á einnig ráðandi hlut í gríska félaginu AEK Aþenu.

Tottenham í Uefa Cup
Uefa Cup var sett á laggirnar árið 1971. Það lið sem var fyrst til að vinna þessa keppni og vígði bikarinn var auðvitað Tottenham Hotspur. Við skulum aðeins fara yfir það ár.
         Við drógumst í fyrstu umferð á móti þáverandi íslandsmeisturum Keflavík. Fyrri leikurinn var háður á Íslandi. Tottenham áttu ekki í miklum vandræðum með Íslendingana í þeim leik og unnu leikinn 6-1. Svo komu víkingarnir úr rokkbænum í heimsókn á WHL nokkru síðar. Ekki veittu þeir okkur meiri mótspyrnu í þeim leik og unnum við leikinn heima 9-0. Keflavík kemur því nokkrum sinnum fyrir í sögubókum Spurs þar sem 9-0 er stærsti sigur okkar í evrópukeppni og 15-1 er stærsti samanlagði sigur okkar í evrópukeppni. Við unnum að leið okkar að titlinum lið eins og Nants og AC Milan. Úrslitaleikurinn var svo á móti Wolverhampton Wanderers. Á þeim tíma var enginn einn úrslitaleikur heldur var spilað tvo leiki og samanlögð úrslit skáru úr um sigurvegara (breytt í einn úrslitaleik árið 1997). Við unnum fyrri leikinn við Wolves 2-1 með tveimur mörkum frá Martin Chivers (markahæsti leikmaður Spurs frá upphafi í evrópukeppni). Seinni leikurinn fór svo jafntefli 1-1 og var það miðjumaðurinn Alan Mullery sem skoraði mark Tottenham í þeim leik.
         Seinni titillinn okkar í Uefa Cup kom svo 12 árum síðar. Leið okkar að titlinum var um margt keimlík leiðinni að fyrsta titlinum. Við byrjuðum á að leggja lágt skrifað lið með miklum mun. Við unnum Drogheda samanlagt 14-0 í fyrstu umferð. Við unnum á leiðinn að titlinum lið eins og Feyenoord og Byern Munchen. Fyrri leikurinn fór 1-1. Úrslitaleikurinn var svo gegn Anderlect. Enn og aftur bar Ísland á góma þar sem Arnór Guðjónsen spilaði með liði Anderlect á þeim tíma. Arnór er svo sannarlega Tottenhammönnum góðu kunnugur eftir þann leik. Hér er video af úrslitaleiknum. Smella hér.
         Síðast spiluðum við í evrópukeppni árið 1999. Við byrjuðum á að leggja Fc Zimbru 3-0 samanlagt. Við duttum svo út í annari umferð á móti Kaiserslautern. Við unnum fyrri leikinn 1-0 heima með vítaspyrnu frá Steffen Iversen. Það var hinsvegar sjálfsmark Carr sem sendi okkur úr keppninni þegar Kaiserslautern vann okkur 2-0.

Tölfræði og staðreyndir

*við höfum spilað 100 evrópuleiki (intertoto undanskilið) og við höfum
Unnið 60
Tapað 21
Jafnt 19

*Við höfum spilað 49 heimaleiki og:
Unnið 40
Tapað 1
Jafnt 8

*Við höfum aldrei dottið út í fyrstu umferð evrópukeppni.

*Við höfum aldrei tapað fyrir tékknesku liði í evrópukeppni (heimildir ótraustar).

*Höfum reyndar tapað hverjum einasta heimaleik á dagsetningunni 28.9 í 43 ár. En aldrei spilað evrópuleik á þessari dagsetningu þannig að þessi tölfræði skiptir engu ;) Minni bara á heimavallatölfræði okkar í Evrópukeppni.

Mitt mat
Það er alveg ljóst að leikmenn Tottenham munu ekki vilja tapa þessum leik á heimavelli sínum eftir að hafa brugðist aðdáendum sínum gegn Liverpool á laugardaginn síðasta. Stuðningsmenn Spurs eru búnir að vera ansi langeygðir eftir að sjá liðið sitt spila í evrópu. Það er enginn leikmaður sem er tilbúinn til að taka það á sig að vera þess valdandi að við dettum út úr keppninni á móti þessu liði. Þess vegna er ég svo viss um að þessi leikur muni vinnast. Þjálfari Slavia Praha sagði eftir fyrri leikinn að þeir þyrftu kraftaverk til að komast áfram. Ég ætla bara að taka undir orð þjálfarans. Það þarf algjört kraftaverk að gerast til að við dettum út á fimmtudaginn. Ég ætla að spá okkur fyrsta þriggjamarka sigrinum í tæpt eitt og hálft ár. Enda eins og oft áður hefur komið fram er ég orðinn ansi þreyttur á biðinni eftir þriggjamarka sigri.

Ég vona að allir njóti þess að horfa á leikinn og styðji við bakið á okkar mönnum þó svo að við séum ekki á vellinum.

COYS!!!

ATH!!!

Upphitun fyrir evrópuleikinn á fimmtudaginn kemur á morgun eða mánudag. Þetta verður ýtarleg upphitun full af fróðleik ;)